Пошук

Дакументальныя карціны, знятыя ў Мінскім Лізавецінскім манастыры, атрымалі дыпломы лаўрэатаў некалькіх міжнародных фестываляў

22 снежня 2022

5 снежня 2022 года ў духоўна-асветніцкім цэнтры «Святадухаўскі» Аляксандра-Неўскай лаўры ў горадзе Санкт-Пецярбургу адкрыўся XVI Міжнародны фестываль хрысціянскага кіно «Неўскі Дабравест». Фестываль доўжыўся 5 дзён і праходзіў на некалькіх пляцоўках.

Дыпломамі ўдзельнікаў фестывалю былі адзначаны знятыя ў Лізавецінскім жаночым манастыры горада Мінска дакументальныя карціны «Сямейныя партрэты. Мастак і яго муза» рэжысёра Анастасіі Кабзаровай і «Служэнне. Матушка Марфа і яе дзеці» рэжысёра Валерыя Шышова.

Кінапраца Анастасіі Кабзаровай «Сямейныя партрэты. Мастак і яго муза» працягвае серыю выпускаў аб сучасных праваслаўных сем'ях — аб іх радасцях і праблемах. У гэты раз мы ў гасцях у сям'і Дзмітрыя і Кацярыны. Рэжысёр фільма таксама атрымала дыплом лаўрэата на IX фестывалі сацыяльнай рэкламы ў абарону жыцця і сям'і «Далонька» ў намінацыі «Лепшы кароткаметражны фільм». У конкурсе ўдзельнічалі больш за 100 работ ад аўтараў з Беларусі і Расіі.

Фільм «Матушка Марфа і яе дзеці» распавядае пра тую частку жыцця Лізавецінскага манастыра і сястрыцтва міласэрнасці пры манастыры, што схавана ад знешняга свету, — служэнне манаскіх асоб і белых сясцёр у шпіталях і дамах-інтэрнатах. «Здаровым людзям ісці да Бога цяжка, у іх усё праз розум. А ў гэтых людзей вельмі блізкі шлях да Бога. Яны Бога адчуваюць сэрцам». Фільм «Служэнне» быў зняты ў дзіцячым доме-інтэрнаце для дзяцей-інвалідаў і ў 2-й гарадской клінічнай бальніцы горада Мінска.

Абедзве дакументальныя карціны даступныя для анлайн-прагляду, іх можна ўбачыць на YouTube-канале Лізавецінскага манастыра.

***

Міжнародны фестываль хрысціянскага кіно «Неўскі Дабравест» — адзін з найстарэйшых хрысціянскіх кінафорумаў Пецярбурга. Фестываль не з'яўляецца конкурсным і праходзіць у форме дабрачынных паказаў. Праграма ўключае як кінапрацы рэлігійнага зместу, так і фільмы, якія распавядаюць аб праблемах сучаснага жыцця, у ліку якіх сацыяльная адаптацыя людзей з абмежаванымі магчымасцямі, барацьба з наркаманіяй і алкагалізмам.

obitel-minsk.ru/monasterium.by/Church.by 

Чытайце нас у Telegram, Viber, Instagram, ВКонтакте і Facebook