Пошук

У дыстанцыйным фармаце прайшлі VIII Тураўскія епархіяльныя адукацыйныя чытанні на тэму: «1030-годдзе Праваслаўя на Беларускай зямлі»

02 лістапада 2021

29 кастрычніка 2021 года па благаславенню епіскапа Тураўскага і Мазырскага Леаніда ў дыстанцыйным фармаце прайшлі VIII Тураўскія епархіяльныя адукацыйныя чытанні на тэму: «1030-годдзе Праваслаўя на Беларускай зямлі». Традыцыйна мерапрыемства аб'ядноўвае духавенства і прадстаўнікоў сферы адукацыі з розных рэгіёнаў Беларусі.

З прывітальным адрасам да ўдзельнікаў чытанняў ад епіскапа Тураўскага і Мазырскага Леаніда звярнуўся ігумен Аўксенцій (Абражэй), намеснік мужчынскага манастыра Нараджэння Багародзіцы ў вёсцы Юравічы, старшыня Аддзела рэлігійнай адукацыі і катэхізацыі Тураўскай епархіі.

«Глыбока сімвалічна, што ў гэты раз форум прысвечаны будучай значнай падзеі ў гістарычнай памяці нашага народа — святкаванню 1030-годдзя знаходжання Праваслаўя на Беларускай зямлі. Гэтаму знамянальнаму юбілею ў Беларускай Праваслаўнай Царкве будзе прысвечаны ўвесь 2022-ы год.

Важна адзначыць, што ў наступным годзе мы таксама будзем успамінаць яшчэ адну памятную падзею — 30-годдзе адраджэння адной з самых старажытных епіскапскіх кафедр на тэрыторыі сучаснай Беларусі — Тураўскай епархіі, якая была заснаваная ў далёкім 1005 годзе, і адкуль Праваслаўе распаўсюджвалася на беларускія землі і захавалася непахісным да нашых дзён.

Захаванне памяці пра мінулае сваёй Айчыны, беражлівыя адносіны да духоўнай і культурнай спадчыны прадвызначаюць здольнасць чалавецтва будаваць будучыню. І тая будучыня, у якой будзе жыць і працаваць цяперашняе маладое пакаленне, шмат у чым залежыць ад нас з вамі», — адзначалася ў прывітальным слове.

У звароце да прысутных Таццяна Сымановіч, дэкан філалагічнага факультэта ўстановы адукацыі «Мазырскі дзяржаўны педагагічны ўніверсітэт імя І. П. Шамякіна», кандыдат педагагічных навук, адзначыла традыцыйна высокую цікавасць да мерапрыемства з боку навуковай грамадскасці, прадстаўнікоў устаноў адукацыі, духавенства, што сведчыць пра важнасць разгляданых праблем, дае шырокія магчымасці для абмену вопытам і адкрывае перспектывы для супрацоўніцтва ў справе выхавання падрастаючага пакалення.

Даклады былі прадстаўлены ў рамках пленарнага пасяджэння і працы секцый «Культурна-гістарычная спадчына беларускага народа: Дыялог пакаленняў», «Хрысціянскія каштоўнасці ў сучасным адукацыйным працэсе», «Узаемадзеянне Царквы і дзяржавы: гістарычны вопыт, асноўныя напрамкі і перспектывы», «Духоўна-маральнае і грамадзянска-патрыятычнае выхаванне ў школе і ВНУ», «Святыні і падзвіжнікі Беларусі», «Гістарычная памяць як фактар кансалідацыі грамадства», «Духоўна-маральнае і грамадзянска-патрыятычнае выхаванне ва ўстановах дашкольнай адукацыі».

Усяго ў працы чытанняў прыняло ўдзел каля 270 дакладчыкаў, якія прадстаўляюць вышэйшыя навучальныя ўстановы, а таксама ўстановы агульнай сярэдняй адукацыі з розных рэгіёнаў Рэспублікі Беларусь.

turovobraz.by/Church.by