Пошук

У Мінскай духоўнай семінарыі прайшлі II Чытанні памяці свяшчэннамучаніка мітрапаліта Пятра (Палянскага)

08 чэрвеня 2017

8 чэрвеня 2017 года па благаславенню рэктара Мінскай духоўнай семінарыі архіепіскапа Навагрудскага і Слонімскага Гурыя адбылася навуковая канферэнцыя «II Чытанні памяці свяшчэннамучаніка мітрапаліта Круціцкага Пятра (Палянскага, 1862-1937)».

Адкрываючы мерапрыемства, рэктар Мінскай духоўнай семінарыі архіепіскап Гурый падаў архіпастырскае благаславенне ўсім удзельнікам і падкрэсліў асаблівую значнасць захавання памяці аб тых праваслаўных хрысціянах, якія ў ХХ стагоддзі незаслужана сталі ахвярай масавых рэпрэсій.

У працы канферэнцыі прынялі ўдзел выкладчыкі і студэнты Мінскай духоўнай семінарыі, навучэнцы Слонімскага духоўнага вучылішча і духавенства Навагрудскай епархіі.

Першым перад прысутнымі выступіў дацэнт кафедры гісторыі Беларусі Гомельскага дзяржаўнага ўніверсітэта імя Францыска Скарыны, кандыдат гістарычных навук С. Ф. Верамееў, які распавёў аб асвятленні апошніх гадоў жыцця Патрыярха Маскоўскага і ўсяе Расіі Ціхана (Бялавіна) ва ўспамінах яго сучаснікаў.

Прафесар Мінскай духоўнай акадэміі, доктар царкоўнай гісторыі іерэй Гардзей Шчаглоў у сваім дакладзе паведаміў аб жыцці і вызнаўчым подзвігу ўраджэнца беларускай зямлі свяшчэннамучаніка Іаана (Пашына; 1881-1938), епіскапа Рыльскага.

Выступленне памочніка сакратара Камісіі па кананізацыі святых Беларускай Праваслаўнай Царквы, кандыдата багаслоўя протаіерэя Дзімітрыя Шылёнка было прысвечана гісторыі абнаўленцкага расколу на тэрыторыі Усходняй Беларусі ў 1920-1930-я гады.

Дацэнт кафедры гісторыі славянскіх народаў Брэсцкага дзяржаўнага ўніверсітэта імя А. С. Пушкіна, кандыдат гістарычных навук А. М. Свірыд расказаў аб сістэме контрзахадаў Праваслаўнай Царквы па супрацьдзеянню распаўсюджванню неауніі на беларускіх землях у 1920-1930-я гады.

У сваім дакладзе прарэктар па навуковай рабоце Мінскіх духоўных семінарыі і акадэміі дацэнт А. В. Слесараў распавёў аб царкоўнай дзейнасці архімандрыта Ціхана (Шарапава) на пасадзе настаяцеля Жыровіцкага манастыра (1922-1924).

Падчас правядзення мерапрыемства былі прадэманстраваны фрагменты пропаведзі Свяцейшага Патрыярха Маскоўскага і ўсяе Русі Кірыла пра навамучанікаў і вызнаўцаў Рускай Праваслаўнай Царквы, фільма аб самым святым Патрыярху Маскоўскім і ўсяе Расіі Ціхане (Бялавіне), а таксама фрагмент мастацкага выканання паэмы Ганны Ахматавай «Рэквіем».

У завяршэнне канферэнцыі Высокапраасвяшчэннейшы архіепіскап Гурый здзейсніў памінальную ліцію аб усіх нявінна пацярпелых у гады ганенняў на Рускую Праваслаўную Царкву ў ХХ стагоддзі.

II Чытанні памяці свяшчэннамучаніка мітрапаліта Круціцкага Пятра (Палянскага, 1862-1937) прайшлі ў рамках рэалізацыі праграмы Мінскай духоўнай семінарыі па захаванню памяці новамучанікаў, вызнаўцаў, і ўсіх праваслаўных хрысціян, нявінна пацярпелых у гады масавых рэпрэсій. Праграма прынята на пасяджэнні Вучонай рады семінарыі, якое праходзіла 29 чэрвеня 2016 года.

МінДС / Church.by