Пошук

У Нацыянальным мастацкім музеі ўручылі ганаровыя граматы ўдзельнікам праекта «Свет нябесны на зямлі»

09 лютага 2017

У Нацыянальным мастацкім музеі Рэспублікі Беларусь адбылася сустрэча, прысвечаная правядзенню сумеснай выставы беларускіх абразоў «Свет нябесны на зямлі», у якую ўвайшлі творы з калекцыі Нацыянальнага мастацкага музея Рэспублікі Беларусь і сучасных іканапісцаў Беларускага Экзархату.

Раней гэтая выстава пад назвай «Беларускі іканапіс XVII–XXI стагоддзяў» і з меншай колькасцю твораў (33 іконы) экспанавалася з 18 па 23 ліпеня 2016 года ў Музеях Ватыкана, атрымала вялікі рэзананс у свеце, стала знакавай падзеяй у Год культуры.

У ходзе мерапрыемства перад шматлікімі наведвальнікамі музея выступіў мужчынскі хор «Усіхсвяцкі» з духоўнымі спевамі і беларускімі народнымі песнямі, паведамляе сайт музея.

Уступным словам мерапрыемства адкрыў генеральны дырэктар музея Уладзімір Пракапцоў, які выказаў шчырую падзяку іканапісцам, удзельнікам хору, а таксама асабіста протаіерэю Фёдару Поўнаму, настаяцелю Усіхсвяцкага храма Мінска, за іх вялікую працу па адраджэнні духоўнай культуры ў Беларусі і далёка за яе межамі, уручыў ім ганаровыя граматы музея.

Падзякі атрымалі: протаіерэй Фёдар Поўны, Павел і Андрэй Жаравы, Аляксей Дзмітрыеў, Вольга Чарняк, Наталля Савушкіна, Кацярына Дайнека, Нона Дуніна, калектыў хору «Усіхсвяцкі» пад кіраўніцтвам Дзмітрыя Такмакова, Патрыцыя Курганава.

Уладзімір Пракапцоў падкрэсліў важнасць праекта, які прайшоў з вялікім поспехам, для развіцця міжнародных культурных сувязяў і нацыянальнага мастацтва. Асабліва важна, па словах генеральнага дырэктара музея, што старажытная традыцыя іканапісу працягваецца ў новых працах сучасных аўтараў.

Sobor.by / Church.by