Пошук

У Оршы адбылася акцыя «Разам у абарону жыцця!»

23 студзеня 2018

На працягу некалькіх гадоў у навагоднія і калядныя святы, у Дзень горада і Дзень Незалежнасці Рэспублікі Беларусь, а таксама ў Дзень маці оршанок, якія сталі маладымі мамамі, віншуе кіраўніцтва горада сумесна са святарамі Оршы. Ім уручаюць спецыяльныя гліняныя плакеткі «Народжанаму ў Оршы», памятныя падарункі.

У калядныя дні 2018 года стартавала традыцыйная раённая круглагадовая прафілактычная акцыя «Разам у абарону жыцця». Павіншаваць аршанак з з'яўленнем на свет іх «калядных зорачак» прыйшлі старшыня райвыканкама Аляксандр Пазняк і благачынны Аршанскай цэнтральнай акругі протаіерэй Валерый Сярко.

Мэр горада звярнуўся да Ганны Ткачук, Аляксандры Цюніс, Вікторыі Завадзкай, Веранікі Гелахавай, Вікторыі Кунцэвіч, Іны Каржыцкай, Алесі Акунёвай, Вольгі Шкурдзюк, Вольгі Акацьевай са шчырымі пажаданнямі здароўя і радасці, а таксама падкрэсліў, што нараджэнне дзіцяці — гэта самая галоўная падзея ў жыцці кожнай сям'і, велізарнае шчасце. Дэмаграфічная бяспека, умацаванне сямейных каштоўнасцей, ахова мацярынства і дзяцінства — прыярытэтныя напрамкі палітыкі дзяржавы, таму намаганні мясцовых органаў улады будуць накіраваны на тое, каб рэгіён прыгажэў і квітнеў, а аршанцаў паўсюль акружалі шчаслівыя ўсмешкі дзяцей.

Ад райвыканкама і Аршанскай раённай арганізацыі ГА «Беларускі фонд міру» Аляксандр Пазняк уручыў загадчыцы радзільным домам Іне Крачак электракардыяграф, які стане добрым памочнікам у дыягностыцы сардэчнай паталогіі ў нованароджаных.

Кранальна і шчыра віншавалі маладых мам і астатнія госці: галоўны ўрач УАЗ «ОЦП» Уладзімір Плыткевіч, благачынны Аршанскай цэнтральнай акругі протаіерэй Валерый Сярко, старшыня Аршанскай раённай арганізацыі грамадскага аб'яднання «Беларускі фонд міру» Юрый Трыбушэўскі. Асаблівыя словы віншаванняў у гэты дзень гучалі ў адрас Вольгі Шкурдзюк і Вольгі Акацьевай, у якіх нарадзіліся двойні: у першай мамы — хлопчыкі, а ў другой — дзяўчынкі. Усяго ў гэтыя святы нарадзілася 11 дзяцей (6 хлопчыкаў і 5 дзяўчынак).

Як заўсёды, падобныя мерапрыемствы ў радзільным доме — гэта вялікае свята, якое не абыходзіцца без выступленняў творчых калектываў. Музычныя падарункі і шмат добрага настрою маладым мамам, медперсаналу, навучэнцам медыцынскага, механіка-эканамічнага каледжаў, якія таксама былі запрошаны на мерапрыемства, паднеслі артысты Дома культуры чыгуначнікаў.

 Віцебская епархія / Church.by