Пошук

У Віцебску прайшла дабрачынная акцыя «белая кветка»

23 мая 2017

На Успенскай плошчы горада Віцебска адбылася другая дабрачынная акцыя «Белая кветка». Упершыню гэта мерапрыемства ля сцен Успенскага кафедральнага сабора прайшло ў маі 2016 года.

Напярэдадні акцыі над Успенскай горкай пачуўся звон, пасля чаго ля ўваходу ў сабор быў адслужаны малебен, які здзейсніў ключнік кафедральнага сабора протаіерэй Міхаіл Мартыновіч.

З прывітальным словам да гасцей свята звярнуўся кіраўнік сацыяльнага аддзела Віцебскай епархіі іерэй Віктар Гляд, які падзікаваў усім, хто прыйшоў на акцыю, і заклікаў гасцей свята дапамагаць тым, хто ў гэтым мае патрэбу.

Арганізатары мерапрыемства выказалі падзяку за садзейнічанне ў правядзенні «Белай кветкі» аддзелу адукацыі, спорту і турызму Віцебскага гарадскога выканаўчага камітэта і яго кіраўніку Ігару Юр'евічу Кіруценка, кіраўніцтву аддзела ідэалагічнай работы, культуры і па справах моладзі Віцебскага гарвыканкама, адміністрацыі Кастрычніцкага раёна горада Віцебска, ДУА «Віцебскі гарадскі цэнтр дадатковай адукацыі дзяцей і моладзі» і яго кіраўніку Наталлі Яўгенаўны Бальшаковай, а таксама ўстановам адукацыі і педагогам, якія прынялі ўдзел у акцыі.

Падчас дабрачыннага канцэрту, арганізаванага на Успенскай плошчы, адбылося ўзнагароджанне пераможцаў конкурсаў «Вальс кветак» (конкурс дзіцячай творчасці, які праходзіў сярод навучальных устаноў Віцебска) і «Дзеці ў храме» (фотаконкурс, арганізаваны Віцебскай епархіяй пры падтрымцы храма Уваскрасення Хрыстова).

З песняй «Міласэрнасці белая кветка» перад гледачамі выступілі Надзея Мадрыкайдэ і Святлана Максімава. Музычныя нумары таксама прагучалі ў выкананні як асобных артыстаў, так і творчых калектываў, сярод якіх: ансамбль «Благо» аддзела адукацыі і катэхізацыі Віцебскай епархіі пад кіраўніцтвам Вольгі Янчанка, выпускніцы Віцебскага жаночага духоўнага вучылішча, студэнты Віцебскай духоўнай семінарыі, Вакальна-казачы ансамбль «Вольніца» пры Віцебскай казачай акрузе, трыа «Каўчэг», дзеці са студыі «Гулівер і ліліпуты». З танцавальнымі нумарамі выступілі: навучэнцы сярэдняй школы № 35 горада Віцебска, танцавальны калектыў «Аллар», вучаніцы нядзельнай школы «Званцы» (вёска Бароўка Лепельскага раёна), дзеці з нядзельнай школы пры храме іконы Божай Маці «Ацаляльніца», выхаванцы харэаграфічнага класа з дзіцячай студыі «Гулівер і ліліпуты» і вучні нядзельнай школы пры храме святога велікамучаніка Георгія Перамаганосца. Не абышлося на канцэрце і без паэзіі. Вершы перад гасцямі акцыі чыталі як юныя чытальнікі, так і прафесіяналы сваёй справы, сярод якіх член саюза пісьменнікаў Рэспублікі Беларусь Алена Фядзяева і паэтка Аляксандра Жураўская.

Маленькім гасцям свята не давалі сумаваць аніматары. На пляцоўцы працавалі майстар-класы дзіцячага цэнтра развіцця «Сава» і шоу мыльных бурбалак «Краіна цудаў».

Кожны жадаючы мог набыць сувеніры і вырабы ручной работы на дабрачынным кірмашы, які развярнуўся на Успенскай плошчы. Там жа можна было пачаставацца свежай выпечкай і гарбатай, а таксама пакаштаваць сапраўднай салдацкай кашы.

Як і год таму, адметнай асаблівасцю мерапрыемства сталі белыя кветкі, якія кожны жадаючы мог набыць за ахвяраванне.

Акцыя «Белая кветка» паўстала яшчэ ў канцы 19-га стагоддзя. Першапачаткова яе мэтай быў збор сродкаў на барацьбу з сухотамі. Усім жадаючым раздаваліся невялікія букеты белых кветак, за якія кожны ахвяраваў, колькі мог, уносячы пасільны ўклад у справу дапамогі хворым людзям. У 2005 годзе акцыя была адроджана ў Лівадыі, а з 2011 года «Дзень белай кветкі» штогод праходзіць у розных гарадах Расіі і на постсавецкай прасторы.

Сродкі, сабраныя ў ходзе мерапрыемства, будуць накіраваны на лячэнне маленькіх жыхароў горада Віцебска: Інэсы Каланіцкай, Марыі Пузанавай, Святагора Хлопцава і Аніты Івановай.

Church.by