Пошук

XV Адзігітрыеўскі хрэсны ход з Віцебска прыбыў на Смаленшчыну

08 жніўня 2017

6 жніўня 2017 года сустрэць юбілейны XV Адзігітрыеўскі хрэсны ход з Віцебска ў Смаленск, прымеркаваны да святкавання ў гонар цудатворнай Смаленскай іконы Божай Маці «Адзігітрыя», на мяжу Беларусі і Расіі (Руднянскі раён) прыбылі: мітрапаліт Смаленскі і Дарагабужскі Ісідар, архіепіскап Віцебскі і Аршанскі Дзімітрый, старшыня Сінадальнага аддзела па справах моладзі Беларускай Праваслаўнай Царквы епіскап Любярэцкі Серафім, епіскап Рослаўльскі і Дзесногорскі Мялецій.

Да сустрэчы хрэснага ходу ў Руднянскі раён з вёскі Мікуліна была дастаўлена шануемая святыня Смаленшчыны — абраз Адзігітрыі (спіс XVII стагоддзя з цудатворнага надбрамнага Смаленскага абраза Божай Маці «Адзігітрыя»).

Архіпастыры сардэчна віталі ўдзельнікаў хрэснага ходу і ўсіх вернікаў, якія сабраліся ў гэты дзень засведчыць яднанне братэрскіх народаў у веры і міры.

Мітрапаліт Смаленскі і Дарагабужскі Ісідар, у прыватнасці, сказаў:

— Мы шчыра вітаем вас, дарагія браты і сёстры ў Хрысце, шчыра сведчым, што ўсе мы — родзічы ў Госпадзе нашым Іісусе Хрысце. Дай Бог, каб гэты міжнародны Патрыяршы хрэсны ход унёс свой значны ўклад ва ўмацаванне дружбы паміж нашымі краінамі, умацаванне нашых брацкіх хрысціянскіх сувязяў, множанне братэрскай любві адзін да аднаго. Сёння, у дзень памяці святых князёў-пакутнікаў Барыса і Глеба, мы яшчэ і яшчэ раз сведчым аб неабходнасці захавання і памнажэння братэрскай любві.

Кіраўнік мітраполіі сардэчна падзякаваў архіепіскапу Віцебскаму Дзімітрыю за магчымасць правядзення Адзігітрыеўскага хрэснага ходу, сумеснай малітвы і Еўхарыстычных яднання на свята ў гонар Смаленскай іконы Божай Маці. На малітоўную памяць мітрапаліт Ісідар паднёс архіепіскапу Дзімітрыю Чынаўнік архіерэйскага служэння.

Архіепіскап Віцебскі і Аршанскі Дзімітрый вітаў удзельнікаў урачыстасці пасхальным воклічам: «Хрыстос уваскрэс!»

— Сэнс нашага чалавечага жыцця заключаецца ў здабыцці Духа Святога, як гаварыў прападобны Серафім Сароўскі, памяць якога мы з вамі адзначалі. Дай Бог, <...> каб мы заўсёды адчувалі гэтую радасць Уваскрасення Хрыстовага. «Хрыстос уваскрэс, радасць мая!» — гэтымі словамі прападобны Серафім Сароўскі сустракаў кожнага, хто прыходзіў. Мне б хацелася словамі прападобнага ўсім вам пажадаць моцы душэўнай і цялеснай і гэтай радасці, — сказаў архіпастыр.

Архіепіскап Дзімітрый паднёс мітрапаліту Ісідару вобраз прападобнага Серафіма Сароўскага, прывезены ад мошчаў святога падзвіжніка са Свята-Траецкай Серафіма-Дзівееўскай абіцелі.

— Прыемна, што хрэсны ход «Адзігітрыя» праходзіць ужо ў пятнаццаты раз. Гэта вялікая справа, — адзначыў старшыня Сінадальнага аддзела па справах моладзі Беларускай Праваслаўнай Царквы епіскап Любярэцкі Серафім. — Бо часта бывае, калі мы пачынаем нейкае мерапрыемства, у нас няма ўпэўненасці ці паўторыцца яно зноў — у наступным годзе, праз два ці тры гады... Але Божай міласцю наш хрэсны ход «Адзігітрыя» праходзіць ужо ў пятнаццаты раз. І прыемна бачыць, што побач са старэйшым пакаленнем удзельнікамі хрэснага ходу з'яўляюцца таксама моладзь і дзеці. Гэта сведчыць аб тым, што Святая Русь жыве і будзе жыць. Бо хрэсны ход — гэта, перш за ўсё, трыумф веры. Гэта сведчанне перамогі Бога над д'яблам. Гэта сведчанне таго, што ўсе мы шчыра адданыя Госпаду Богу. І да тых часоў, пакуль па нашай святой рускай зямлі будуць хадзіць хрэсныя хады з малітвай Госпаду Богу, Царыцы Нябеснай, да ўсіх нашых святых заступнікаў, то, сапраўды, Гасподзь будзе захоўваць Святую Русь.

Епіскап Рослаўльскі і Дзеснагорскі Мялецій адзначыў, што за гады, якія Адзігітрыеўскі хрэсны ход праходзіць па Смаленшчыне, многія хрэснаходцы сталі для смалянаў па-сапраўднаму роднымі людзьмі:

— Я зараз гляджу на вас: за тыя доўгія гады, якія мы маем шчасце вітаць вас на Смаленскай зямлі, прымаючы вас на вашых прыпынках, вашы твары сталі ўжо роднымі. Гэта значыць праз справу Божую мы ўсе робімся роднымі. Ваша цяжкая праца — гэтае богаўгоднае шэсце, і мы стараемся, каб хоць чым-небудзь дапамагчы вам ісці, а праз гэта спадзяемся, што праз нашу малітву і суперажыванне вам — праз язвы на вашых нагах ласкай Божай Гасподзь і пазбавіць нас ад язваў грахоўных. Праз ваша добраахвотнае знемажэнне дзеля Хрыста, праз нашы прыёмы вас і сумесную з вамі радасць Гасподзь явіць і нам, грэшным, ласку. Дай Бог, каб яшчэ многія і многія гады гэтае шэсце, якое папярэднічае святу Маці Божай Адзігітрыі, працягвалася.

Словы віншавання прагучалі і ад прадстаўнікоў свецкай улады Смаленскага і Віцебскага рэгіёнаў.

— Сёння юбілейны дзень — сёння ў пятнаццаты раз праходзіць Адзігітрыеўскі хрэсны ход. Значэнне гэтага хрэснага ходу складана пераацаніць, — адзначыў кіраўнік Руднянскага раёна Юрый Іванавіч Івашкін, падкрэсліўшы, што праваслаўная вера — гэта тое, што «аб'ядноўвала, аб'ядноўвае і, я спадзяюся, будзе аб'ядноўваць нашы народы, незалежна ад таго, у якіх дзяржавах мы жывем».

В. а. начальніка аддзела па справах рэлігій і нацыянальнасцяў Віцебскага абласнога выканаўчага камітэта Сяргей Мікалаевіч Фадзеенкаў падкрэсліў важнасць хрэснага ходу для Віцебскай зямлі:

— Вельмі прыемна, што тая граніца, якая некалі падзяліла нас на дзве дзяржавы, зараз з'яўляецца тым месцам, дзе мы сустракаемся, дзе мы верым, дзе мы любім адзін аднаго. Вельмі прыемна, што шэсце хрэснага ходу праходзіць падчас такой прыемнай і ўрачыстай сустрэчы.

Хрэсны ход з Віцебска ў Смаленск з'яўляецца лагічным завяршэннем вельмі важнага і патрэбнага маладзёжнага фестывалю «Адзігітрыя», які праходзіць у нас, у горадзе Віцебску. Фестываль моладзевы, і сёння я бачу, што ў хрэсным ходзе ўдзельнічае яшчэ больш дзетак, яшчэ больш моладзі, а там, дзе дзеці, дзе моладзь, — там заўсёды ёсць будучыня.

З прывітальным словам да прысутных звярнуўся таксама старшыня Лёзненскага райвыканкама Іван Антонавіч Лаўрыновіч.

Мітрапаліт Ісідар падзякаваў прадстаўнікам выканаўчай улады Віцебскай вобласці Рэспублікі Беларусь за супрацоўніцтва і выказаў надзею на далейшае стварэнне і развіццё многіх іншых сумесных праектаў паміж рэгіёнамі.

У працяг урачыстасці ля Мікулінскай іконы «Адзігітрыя» архіпастырамі пры ўдзеле духавенства і хрысталюбівай паствы быў здзейснены падзячны малебен Божай Маці, пасля якога багамольцы з глыбокай павагай пацалавалі святыню.

— Дай Бог, каб у Святой Русі памножыліся моладзевыя хрэсныя хады. І не толькі з Віцебшчыны, але і з іншых рэгіёнаў моладзь магла прайсці хрэсны ход да шанаваных месцаў і святынь Святой Русі, розных месцаў, не толькі Смаленшчыны. <...> Дай Бог, каб <...> людзі далучаліся да нашых хрэсных хадоў, арганізоўваліся ў новыя хрэсныя хады да іншых святынь Святой Русі. І дай Бог, каб усе мы сведчылі аб нашай любві адзін да аднаго, — пажадаў на заканчэнне мітрапаліт Ісідар.

Кіраўнік Смаленскай мітраполіі акрапіў удзельнікаў хрэснага ходу святой вадой і благаславіў працяг шэсця.

Віцебская епархія,  Смаленская епархія / Сhurch.by