Пошук

Патрыяршы Экзарх наведаў летні злёт моладзі Беларускай Праваслаўнай Царквы

28 ліпеня 2019

Мітрапаліт Мінскі і Заслаўскі Павел, Патрыяршы Экзарх усяе Беларусі, наведаў Летні злёт моладзі Беларускай Праваслаўнай Царквы, які праходзіў з 24 па 28 ліпеня 2019 г. у гарадах Столін (24-25 ліпеня) і Пінск (25-28 ліпеня).

Арганізатары мерапрыемства — Сінадальны аддзел па справах моладзі і прыход храма Пятра і Фяўронні Пінскай епархіі.

Злёты беларускай праваслаўнай моладзі праводзяцца рэгулярна з мэтай актуалізацыі і прасоўвання нязменных евангельскіх каштоўнасцяў у асяроддзі сучаснай моладзі, рэалізацыі магчымасці сустрэчы прадстаўнікоў царкоўных моладзевых арганізацый, зносін з цікавымі гасцямі, сумеснага карыснага і цікавага баўлення часу.

Другі год запар праваслаўны моладзевы форум праводзіць сваю працу на Палессі, у двух гарадах — Століне і Пінску.

У праграме злёту арганізатары заўсёды імкнуцца злучыць хрысціянскае напаўненне з актыўным адпачынкам і інтэлектуальным складнікам, таму форум уключаў у сябе рухавыя гульні, зносіны з цікавымі лектарамі, а галоўнай яго падзеяй традыцыйна стала начная Бажэственная літургія.

У якасці лектараў на злёт былі запрошаны:

• іераманах Макарый Маркиш — клірык Іванава-Вазнясенскай епархіі, пісьменнік-місіянер, заснавальнік праекта «Бацюшка анлайн» з тэмай «Сапраўдны мужчына – хто ён?»;
• протаіерэй Павел Сярдзюк, настаяцель прыхода храма свяціцеля Мікалая Японскага, з тэмай «Свяшчэннае Пісанне пра сям'ю і шлюб» і матушка Вера Сярдзюк, культуролаг, публіцыст, старшыня Цэнтра падтрымкі сям'і і мацярынства «Матуля» і мама пецярых дзяцей, з тэмай «Хрысціянка ХХІ стагоддзя»;
• Саладкоў Андрэй Іванавіч, выкладчык сектазнаўства, місіялогіі, гісторыі рэлігій у Расійскім праваслаўным універсітэце (Масква) і Пярэрвінскай праваслаўнай духоўнай семінарыі, штатны місіянер Паўднёва-Заходняга вікарыяцтва г. Масквы, з тэмай «Ці выракалася навука Бога?».

Майстар-класы, міні-гутаркі, спартыўныя гульні, экскурсіі ў музеі, плаванне на цеплаходзе, песні пад гітару ля вогнішча на беразе ракі былі такой жа неад'емнай часткай злёту, як ранішняе і вячэрняе малітоўнае правіла. Найбольшай папулярнасцю карысталіся майстар-класы: «Царква і медыя» ад гасцей з Санкт-Пецярбургскіх духоўных школ; экспрэс-ўрок па спевах для тых, хто ніколі не спяваў, і экспрэс-ўрок па танцах, для тых, хто ніколі не танцаваў. Для тых, хто будуе самыя сур'ёзныя планы на жыццё, была праведзена гутарка па прафесійнай арыентацыі.

У пятніцу 26 ліпеня ўдзельнікі злёту сустракалі мітрапаліта Мінскага і Заслаўскага Паўла, Патрыяршага Экзарха ўсяе Беларусі. Уладыка звярнуўся да маладых людзей і прапанаваў паразважаць аб свабодзе, аб розніцы ў напаўненні гэтага паняцця хрысціянскай свядомасцю і сучасным секулярным светам. Здавалася б, сучаснае грамадства прапануе чалавеку неабмежаваную свабоду выбару, але часта ў выніку такой свабоды чалавек становіцца рабом найбольш моцнай цягі, а значыць, падвяргаецца сумненню і яго свабода. Для нас, хрысціян, свабода караніцца ў абсалютным пачатку — Богу, і калі чалавек падпарадкуе сваю волю Боскай, то ён здабудзе вышэйшую свабоду, менавіта Хрыстова ісціна робіць нас свабоднымі — падкрэсліў уладыка Павел.

Затым гутарка перайшла ў рэчышча дыялогу: маладыя людзі задавалі пытанні, а ўладыка мітрапаліт на іх адказваў, адкрыта дзелячыся вопытам, эпізодамі свайго жыцця і архіпастырскага служэння.

На развітанне архіпастыр адзначыў, што ў маладыя гады варта не толькі марыць і будаваць планы на будучыню, але і імкнуцца рабіць усё магчымае, каб увасобіць свае мары ў жыццё, і заклікаў маладых людзей не баяцца цяжкасцяў, а з Божай дапамогай і сваёй руплівай працай рэалізоўваць задуманае.

Ноччу з 26 на 27 ліпеня, у пінскім храме ў гонар святых Пятра і Фяўронні Мурамскіх была здзейснена Бажэственная літургія, якая стала кульмінацыяй праваслаўнага моладзевага форуму. Літургію ўзначаліў протаіерэй Іаан Задарожын, старшыня Сінадальнага аддзела па справах моладзі, у саслужэнні святароў-удзельнікаў злёту. Пасля богаслужэння адбыўся агульны стол на ўзор трапез любові першых хрысціян — агап.

Падчас форуму таксама прайшла нарада кіраўнікоў епархіяльных аддзелаў па справах моладзі; яны дзяліліся вопытам, напрацоўкамі, кожны выступіў са справаздачай аб поспехах у сваёй дзейнасці.

«Мы шмат месяцаў рыхтуемся да злётаў, стараемся напоўніць кожны з іх арыгінальнай цікавай праграмай, каб любы з удзельнікаў знайшоў сабе занятак па душы і правёў час з карысцю. Вельмі радуе, што гасціннасць святароў і абшчыны святых Пятра і Фяўронні Мурамскіх і магчымасці пляцоўкі пры храме, дазваляюць у максімальнай меры рэалізаваць задуманае» — дзеліцца супрацоўнік Сінадальнага аддзела па справах моладзі Беларускай Праваслаўнай Царквы Аксана Чырко.

У працы форуму прынялі ўдзел 250 маладых людзей з усёй краіны і з-за мяжы. Падвёў вынік злёту заключны канцэрт, дзе прадстаўнікі епархій камандамі паказалі свае таленты.

Фота: медыяхолдынг «Варяг»

Сhurch.by