400 км на веласіпедах: завершаны моладзевы прабег «Па святых мясцінах Гомельшчыны»
18 жніўня 2017
16 жніўня на падворку Успенскага сабора Рэчыцы завяршыўся велапрабег «Па святых мясцінах Гомельшчыны», які стартаваў 9 жніўня ад Петра-Паўлаўскага кафедральнага сабора Гомеля. Больш за 400 кіламетраў на веласіпедах пераадолелі за восем дзён школьнікі — удзельнікі велапрабегу. За гэты час яны паспелі наведаць храмы ў гарадах Ветка, Чачэрск, Рагачоў, Жлобін, Светлагорск, гарадскіх пасёлках Корма і Доўск і вёсцы Свяцілавічы.
14 жніўня намётавы лагер хлопцаў быў разбіты на начлег у Рэчыцкім раёне каля ракі Ведрыч. На наступны дзень падлеткі разам з педагогамі і кіраўніком мерапрыемства, дырэктарам гомельскай сярэдняй школы № 12 Вячаславам Антоненка, наведалі храм прападобнай Еўфрасінні Полацкай у вёсцы Азяршчына. Настаяцель храма протаіерэй Іаан Вячорка правёў экскурсію, расказаў гісторыю будаўніцтва царквы і кароткае жыціе святой князёўны-ігуменні. Увечары 15 жніўня ўдзельнікі велапрабегу сустрэліся з клірыкам рэчыцкага прыхода храма Пакрова Прасвятой Багародзіцы іерэем Валерыем Апановічам.
16 жніўня ў Успенком саборы адбылося ўрачыстае закрыццё турыстычнага лагера. Пасля падзячнага малебна настаяцель сабора, благачынны Рэчыцкай акругі протаіерэй Алексій Пешка ад імя епіскапа Гомельскага і Жлобінскага Сцяфана ўручыў падзячныя лісты ўсім удзельнікам мерапрыемства і перадаў архіпастырскае благаславенне.
Насычаная праграма велапрабегу ўключала ў сябе зносіны са святарамі, спартыўныя і турыстычныя спаборніцтвы, квэст-гульні, а таксама экскурсіі па гарадах. Велапаломніцтва патрабавала ад рабят сур'ёзных фізічных намаганняў, але пры гэтым падарыла выдатную магчымасць развіцца духоўна, завязаць новыя знаёмствы, палюбавацца прыгажосцю роднай зямлі.
Афіцыйны партал Беларускай праваслаўнай Царквы
© Беларуская Праваслаўная Царква 2019
Пры перадруку матэрыялаў спасылка на church.by абавязковая.
Калі вы хочаце задаць пытанне ці выказаць свае меркаванне з нагоды сайта або артыкулаў,
напішыце нам, скарыстаўшыся паштовай формай.
