Пошук

Малебен ля мошчаў свяціцеля Ціхана адкрыў Архіерэйскі Сабор Рускай Праваслаўнай Царквы

29 лістапада 2017

29 лістапада 2017 года ў Зале царкоўных сабораў кафедральнага саборнага Храма Хрыста Спасіцеля ў Маскве пачаў работу Архіерэйскі Сабор Рускай Праваслаўнай Царквы. Праграма Сабора ўключае юбілейныя ўрачыстасці, прысвечаныя 100-годдзю аднаўлення Патрыяршаства і інтранізацыі Патрыярха Ціхана, якая адбылася 4 снежня 1917 года, у свята Увядзення ў храм Прасвятой Багародзіцы, у Успенскім саборы Крамля.

Да пачатку Сабора ў Храм Хрыста Спасіцеля з Данскога стаўрапігіяльнага мужчынскага манастыра былі прынесеныя пачэсныя мошчы свяціцеля Ціхана, Патрыярха Маскоўскага.

Пачатку пасяджэнняў папярэднічала Бажэственная літургія ў Храме Хрыста Спасіцеля, якую здзейснілі ключнік кафедральнага сабора протаіерэй Міхаіл Разанцаў і маскоўскае духавенства. За Літургіяй маліліся Свяцейшы Патрыярх Маскоўскі і ўсяе Русі Кірыл і прыбыўшыя на Архіерэйскі Сабор іерархі.

Да пачатку богаслужэння ў цэнтры Храма Хрыста Сапсіцеля была ўстаноўлена новая рака для пачэсных мошчаў свяціцеля Ціхана, створаная да 100-годдзя аднаўлення Патрыяршаства ў Рускай Праваслаўнай Царкве. 18 лістапада 2017 года, у дзень 100-годдзя абрання на Патрыяршы прастол свяціцеля Ціхана, рака была асвечана Святым Патрыярхам Маскоўскім і ўсяе Русі Кірылам у Вялікім саборы Данскога манастыра.

Па заканчэнні Літургіі адбылася сустрэча пачэсных мошчаў свяціцеля Ціхана, якія былі прынесены ў Храм Хрыста Спасіцеля з Данскога манастыра.

Свяцейшы Патрыярх Маскоўскі і ўсяе Русі Кірыл выйшаў да заходняй брамы Храма Хрыста Спасіцеля, куды прыбыў аўтамабіль з пачэснымі мошчамі свяціцеля Ціхана. Першы вікарый Свяцейшага Патрыярха па горадзе Маскве мітрапаліт Істрынскі Арсеній, кіраўнік Адміністрацыйнага сакратарыята Маскоўскай Патрыярхіі архіепіскап Сонечнагорскі Сергій, епіскап Падольскі Ціхан і епіскап Бронніцкі Парамон унеслі труну з пачэснымі мошчамі ў Храм Хрыста Спасіцеля і ўклалі яго ў раку.

Перад мошчамі свяціцеля Ціхана Свяцейшы Патрыярх Кірыл здзейсніў малебны спеў на адкрыццё Архіерэйскага Сабора. Яго Свяцейшаству саслужылі мітрапаліт Істрынскі Арсеній, архіепіскап Сонечнагорскі Сергій, епіскап Падольскі Ціхан і епіскап Бронніцкі Парамон, протаіерэй Міхаіл Разанцаў, духавенства Масквы.

Свяцейшы Патрыярх Кірыл прачытаў малітву, просячы благаславення Божага на будучую працу Сабора.

Пасля пакланення мошчам свяціцеля Ціхана Прадстаяцель Рускай Праваслаўнай Царквы звярнуўся да ўдзельнікаў богаслужэння са словам:

«Ваша Блажэнства! Вашы Высокапраасвяшчэнствы і Праасвяшчэнствы! Дарагія айцы, браты і сёстры!

Усіх вас сардэчна вітаю ў першы дзень працы нашага Сабора. Перад мошчамі свяціцеля Ціхана, які вярнуўся ў храм гэты, дзе адбылося яго абранне, які вярнуўся мошчамі сваімі; перад гэтым цудам Божым мы, несумненна, усе ўмацоўваемся ў веры і духоўна выпраўляем сябе. Сапраўды, Царква па-за часам і па-за прасторай. Царква ― гэта прысутнасць Божага Царства на зямлі. І ўваходжанне пад скляпенні гэтага храма свяціцеля Ціхана, які скончыў жыццё так цяжка і прайшоў да смерці сваёй праз такія пакуты, а затым ўкрыжаванага гісторыяй, абылганага і як быццам бы нават выкрэсленага з гісторыі, — гэта мы ўрачыста сустракаем напярэдадні стагоддзя яго ўзыходжання на Маскоўскі Патрыяршы прастол.

Тое, што адбываецца, гэта, вядома, яўленне Божай прысутнасці ў нашым жыцці, яўленне сілы і славы Божай. І дай Бог, каб усе гэтыя велічныя знакі Божай ласкі над намі, над нашай Царквой, умацоўвалі нас у нашай паўсядзённай працы — і ў маючай адбыцца рабоце Архіерэйскага Сабора нашай Царквы. Саборы збіраюцца для таго, каб можна было сумесна вырашыць найбольш важныя задачы, якія стаяць перад Царквой. Але Сабор з'яўляецца таксама і вопытам велізарнай сілы, духоўным вопытам, калі архіерэі разам, молячыся і працуючы, усведамляючы гістарычную адказнасць за кожнае сваё слова, кожнае дзеянне, разам працуюць, умацоўваючы адзінства Святой Саборнай і Апостальскай Царквы.

Сабор ― гэта не толькі разважанне над тэмамі, гэта не толькі выступленні, гэта не толькі складанне дакументаў, але гэта ў першую чаргу сумесная духоўная праца, якая пачынаецца малітвай і працягваецца падчас саборных пасяджэнняў. Няхай Гасподзь усім нам дапаможа прайсці са славай і гонарам святыя дні Сабора, каб наша Царква выйшла з Сабора яшчэ больш дужай, духоўна засяроджанай у адзінстве, моцнай, каб слова наша было пераканаўчым і выратавальным для ўсіх тых людзей, якія гэта слова гатовыя чуць і якія гэтым словам кіруюцца на сваім шляху да Царства Нябеснага.

Малітвамі свяціцеля Ціхана няхай наставіць на розум, умацуе і ахавае ад усякага зла Гасподзь Уседзяржыцель епіскапат нашай Царквы, які сабраўся на Архіерэйскім Саборы напярэдадні стагоддзя аднаўлення Патрыяршаства ў Рускай Праваслаўнай Царкве. Амінь».

Прэс-служба Патрыярха Маскоўскага і ўсяе Русі / Church.by